Mokabat ngadto sa P5,700,000.00 ang kinatibuk-ang balor sa proyektong pagkongkreto sa karsada gikan sa National Higway padulong ngadto sa Evacuation Center sa Siayan, Zamboanga del Norte nga anaa mahimutang sa sitio Calaton, brgy Poblacion sa lungsod.

Mao kini ang nasayran ning PN sigun sa nadawat ning tigpatrolya nga usa ka kopya sa program of works o POW sa maong proyekto gikan sa buhatan sa Engineering sa lungsod sa pagpangulo ni Engr. Ninjulsiv A. Galit.

Ang gitas-on sa karsadang kongkretohon mokabat ngadto sa 530.00 ln meters nga gikatakdang 120 ka adlaw ang gidugayon sa pagtrabaho niini.

Sa maong program of works sa nahisgutang proyekto gikantar usab ang mga scope sa trabaho sama sa surplus common excavation, structure excavation, sub-grade preparation, aggregate subbase course, Portland cement concrete pavement, structural concrete, pipe culvert, grouted riprap, stone masonry, ingon man sign o billboard.

Kahinumdoman nga  aprobado sa mayoriyang miyembro sa mga magbabalaod sa Siayan, ZN ang usa ka resolution nga naghangyo sa gobernador ning probinsiya paghatag ug ayoda aron sa pagkongkreto sa dalan padulong sa multi-purpose evacuation center sa lungsod balor ug 7 milyones ka pesos.

Diin, ang probinsiyal nga kagamhanan sa ZN isip 1st party nga girepresentahan ni Provincial Governor Roberto Y. Uy ug ang local nga kagamhanan sa isip 2nd party ning lungsod nga girepresentahan ni Mayor Atty. Josecor S. Gepolongca misulod ug us aka Memorandum of Usufruct.

Diin sa maong memorandum ang kagamhanang probinsiyal magtukod ug building nga Multi-purpose Evacuation Center sa gipanag-iyahang luna sa yuta sa local nga kagamhanan sa Siayan nahimutang sa sitio Calaton, brgy Poblacion, otorisado sa sangguniang Bayan ilawom sa resolution no. 075 series of 2017, penitsahan ug Marso 17, 2017.

Diin ang nag-unang problema mao ang agianan o karsada padulong o pagbalik sa naasoyng evacuation center hinungdang dinaliang pagcontruct sa kongkretong dalan ang gikinahanglan kaayo ilabi na nga ang luna diin nahimutang ang evacuation center kasamtangan pa kining gihimo o gigamit isip Ligtas Covid Center alang sap ag quarantine sa mga Locally Stranded Individuals tungod sa pandemyang covid19 ug sa bisan unsa pa unyang mga kalihokan nga gamitan sa maong edipisyo.

Hinungdang pinasikad sa mga nasaysay sa unahan ug sa motion nga gipadas-og ni Hon. Oliver A. Romero, ug gisigundahan sa pipila ka mga miyembro sa mga magbabalaod sa lungsod naaprob ang maong resolution.

Napasar kini atol sa regular nga session sa mga miyembro sa Sangguniang Bayan sa Siayan sa pangpangulo ni Presiding Officer Vice Mayor Primitivo D. Castillo sa niaging Hulyo 13, 2020 ug gipirmahan ni Mayor Atty. Josecor S. Gepolongca.——–