Padayong gipatuman karon sa local nga kagmahanan sa Siayan, Zamboanga del Norte sa pagpangulo ni Mayor Atty. Josecor S. Gepolongca ang ordinansa sa lungsod nga nagdili sa pagamit ug mga cellophane, sando bags ug styro foam, partikularmenti sa mga tindahan ug nagkadaiyang patigayon.

Kini ang naobserbahan sa pipila ka mga Siayanon partikularmenti na diha sa pagpamalit sa mga tindahan sa merkado publiko sa lungsod.

Naasoyng ordinansa sa lungsod giulohan kini ug, “An ordinance regulating the use of plastic cellophane and sando bags as packaging materials and utilization of polystyrene, commonly known as styrofoam, for food beverages containers in the Municipality of Siayan, Zamboanga del Norte.

Lamang nasayran nga sa pagkakaron hinay hinay pa ang pagpatuman sa maong ordinansa aron dili makalitan ang tanan. Hinungdang ang hugot nga pagpatuman niini gihimo lang una sa adlawng Domingo.

Diha sa napandayng ordinansa nasayran nga ang rason nganong dili na ipagamit ang mga plastic cellophane, sando bags ingon man ang styro foam nga mga sudlanan sa pagkaon, gumikan kay matud pa makahatag kinig kadaot sa palibot nga moresulta sa pagbara niini diha sa mga canal, nga diin maglisod na ug agos ang tubig ug makahatag na hinoon kinig kadaot sa kalikopan.

Lamang giingon usab sa maong ordinansa sa lungsod nga aron dili maglisod ang mga kostumers diha sa ilang pagpamalit, mahimong magdala usab sila ug ilang kugalingong sudlanan nga dili cellophane, sando bag o styro foam.

Sama pananglit sa pagdala sa mga sundalanan nga magamit pa pag-usab sama sa bayong, panapton nga bag, oway o nito nga basket, bag nga hinimo sa dahon sa saging, taro, tikog, mais ug uban pa.

Sa katuyoan sa maong ordinansa, technical working group ang giumol nga gilangkoban sa mga mosunod:

Municipal Mayor isip Chairman. Municipal vice Mayor isip co- chairman. SB Committee on Environment isip Vice chairman. Ug ang mga miyembro niini mao ang Mun. Environment Management office, Public Information Office, Public Market and Slaughter House department, SB Committee Chairman Market and Slaughter House, ug SB Committee chairman on Trade and Commerce.

Hugtanong misanong sa pagtuman sa maong ordinansa ang mga tindahan, establisemento ug mga nagkadaiyang patigayon diha sa merkado publiko ning lungsod aron makalikay sa mga silot o multa nga gitakda sa maong ordinansa alang niadtong makalapas niini.

Sama sa unang paglapas, P500.00 ang multa. P1,000.00 ka pesos sa ikaduhang paglapas, ug sa ikatulong paglapas sa maong ordinansa P3,000.00 ang multa ug pagkaselar sa lisensiya sa pagpadagan sa negusyo.———